GENERAL SANTOS CITY – Personal grudge ang nakit-ang motibo sa kapulisan sa pagpamusil sa usa ka negosyante sa isda nga nahitabo sa Barangay Apopong ning dakbayan.
Sa pakighinabi sa Bombo Radyo, gibutyag ni P/Major Patrich Elma, ang hepe sa Makar Police Station nga aduna nay daang bangi ang biktima nga nailhan nga si Elvis Migaton Sanpolan, hamtong ang pangidaron og ang suspek nga si Ivan Roy Larun Ventura, 40 anyos nga pulos residente sa Purok 7, New Society ,Apopong.
Gibutyag ni Elma nga ang away sa duha ang nag-ugat sa arkila sa balay nga nagresulta sa pagpamusil.
Sa pamahayag sa nasangpit nga opisyal nga nagpadayon ang gilusad nga manhunt operations ang mga otoridad batok sa gitudlong suspek sa krimen nga kahinumduman nahitabo kagahapon alas-11:00 sa buntag.
Sa karon ang biktima nagpabiling anaa sa tambalanan human nga nakaangkon ug tulo ka samad pinusilan sa lawas.
Padayon karon ang ginahimong imbistigasyon sa mga otoridad kalabot sa maong insidente.
