Planado ang gihimong surprise rally sa EDSA People Power Monument, mao kini ang gipadayag sa Malacañang.
Matod ni Palace Press Officer Usec. Claire Castro, sayo pa sa kaadlawon nahibaloan na ni Pangulong Ferdinand Marcos Jr. ang mahitungod sa protesta.
Sumala pa niya nga tinuyo gyud sa mga organizer nga itago ang ilang plano aron mahimong usa ka “surprise rally,” nga matod niya dili uyon sa balaod ug wala usab nagtagad sa katungod sa ubang mga katawhan.
Bisan pa niini, giingon ni Castro nga dili niya makumpirma kon adunay nahitabong kakulang sa intelligence.
Matod niya, ang Department of the Interior and Local Government (DILG) ug ang Philippine National Police (PNP) ang mas makatubag kon adunay kakulang sa intelligence gathering.
Dugang pa ni Castro, gipangayo ni Pangulong Marcos ang katin-awan gikan sa DILG ug PNP kon giunsa pagkahimo sa kalit nga protesta.
Ang Malacañang kaniadto miingon nga ang isyu nga giatubang ni Senador Rodante Marcoleta anaa na karon sa hurisdiksyon sa Office of the Ombudsman ug nga ang Presidente wala nay dugang nga kalambigitan sa proseso.
Giingon usab ni Castro nga ang reklamo may kalabotan sa giingong pagdawat ni Marcoleta og P75 milyon nga donasyon sa dihang kongresista pa siya, nga matod niya giangkon mismo sa senador.
