Nagtuo ang kanhi Integrated Bar of the Philippines National Executive Director Atty. Antonio Ligon nga tukma kaayo ang paggamit ni Atty. Lorna Kapunan sa termino nga “Superman” aron ihulagway ang aktuwal nga paggamit ni VP Sara Duterte sa iyang confidential ug intelligence funds.
Gibalik ni Ligon ang mga nadiskubrehan sa pagtaral diin dagkong kantidad sa kuwarta ang giapod-apod sulod sa usa ka adlaw apan sa lain-laing lugar sa Pilipinas, base sa mga acknowledgement receipt nga gipakita sa House panel.
Matud ni Ligon, kinahanglan nga mahimong usa ka “Superman” aron mahimo ang ingon ani nga sistema.
Epektibo usab, matud niya, ang maong termino sa paghulagway nga dili kini yano o kasagarang panghitabo, ilabina kay pondo sa katawhan ang gigamit.
Gipunting usab ni Ligon ang paggamit sa kampo ni VP Sara sa mga alyas ug halos dili katuohan nga mga ngalan isip usa ka “red flag” ug dakong iregularidad.
Sumala sa abogado, mahimo matod pa kining dawaton kung kausa lamang nahitabo. Apan, matud niya, balik-balik kini nga gihimo sa mga opisina ni VP Sara, base sa mga gipakita sa House prosecution panel.
Matud pa niya, makita nga adunay “pattern” sa maong sistema ug dugay na kini nga gihimo sa kampo ni VP Sara. Dugang pa ni Ligon, dili usab igo ang acknowledgement receipt nga mao lamang ang ebidensya nga nadawat sa mga recipient ang intelligence funds.
Kasagaran, matud niya, gigamit lamang ang ingon niini nga mga resibo sa mga merkado ug dili angay gamiton sa opisyal nga transaksyon sa mga ahensya sa gobyerno nga naggamit sa kwarta o pondo sa gobyerno.
