GENERAL SANTOS CITY – Mas gipalawman pa sa Lagao Police Station ang gipahigayong imbestigasyon sa sunud-sunod nga pagpamusil sa ilang area of responsibility sulod sa duha ka adlaw.
Kini human nga laing pagpamusil na usab ang natigayon sa Brgy Lagao ning dakbayan, partikular sa Emerald St., Loveland Subdivision, kung asa ang labing ulahing biktima usa ka 61-anyos nga lalaki.
Giila ang biktima nga si Danilo Ongria, taga-Prk Matibay, Brgy San Isidro ning siyudad. Sa inisyal nga report, sakay ang biktima sa usa ka tricycle dihang gipusil sa nag-inusarang gunman nga naka-motorsiklo.
Naigo ang biktima sa likod sa iyang dalunggan nga milapos sa iyang aping.
Paspas nga misibat ang suspek, samtang gilayong gidala sa Dr. Jorge P. Royeca Hospital ang biktima.
Kahinumduman nga kaniadtong Miyerkules usab sa gabii, gipusil-patay sa riding in tandem ang usa ka sikad-driver nga giilang si Jeric Barrido atubangan sa usa ka fastfood chain.
Matud ni Police Chief Inspector Peter Pinalgan, hepe sa nasampit nga presinto, wala pa silay matumbok nga motibo sa pagpamusil, apan galaum nga makatabang ang nakuha nga CCTV footage sa crime scene.
Gikabutyag nga kanhing drug surrenderee sa Koronadal City ang biktima.
Hinungdan nga hugot karon ang imbestigasyon sa kapulisan kalabot sa naasoy’ng mga pagpamusil.
