GENERAL SANTOS CITY – Gidudahan karon nga may foul play sa natigayong sunog sa Blaan Community Village sa Brgy Labangal ning dakbayan, nga gikamatay sa usa ka inahan ug duha ka anak.
Lakip kini karon sa mga anggulong ginatutukan sa mga otoridad, nga posibleng gituyo ang pagsunog sa panimalay nga may boarding house ug internet cafe.
Kahinumduman nga ang mga biktima nga namatay mao silang Jovelyn Games, ang inahan, ug ang duha ka anak niini nga silang Earl Mason Cagas, singko anyos, ug Shaun Anthony, tres anyos kung asa pulos napaig ang mga nasampit human ma-trap sulod sa nasunog nga panimalay.
Una nang gikabutyag nga posibleng ang paggamit ug series connection sa mga panimalay nga posebling nag-overload ang maoy hinungdan sa sunog.
Apan sa pagkakaron, nagpadayon pa ang imbestigasyon sa kapulisan ug kabomberuhan aron masayran ang tinuod nga rason sa sunog.
