GENERAL SANTOS CITY – Gikondina ni Gensan Mayor Ronnel Rivera ang sunod-sunod nga pagpamusil sa mga motor riding criminal nga gikamatay sa tulo ka biktima sulod lamang sa duha ka adlaw.
Matud pa ni City Councilor Jose Edmar Yumang, Peace and Order committee chairman sa Sanggunian Panglungsod sa dakbayan nga gipatawag ni Mayor Rivera si City PNP Director Col. Aden Lagradante aron hatagan og pagpaklaro ang tulo ka pagpamusil sa syudad sa nakalabay nga adlaw.
Aging gabie, patay sa pagpamusil ang mag-amang Anthony Angin 59 og anak niining si Michael Angin 35 anyos nga residente sa Purok Sta Teresita, San Isidro ning syudad nga gipusil sa 4 ka suspek.
Dugang ni Kag. Yumang nga maka-alarma na ang mga kamatay sa dakbayan tungod dili na gagamit og helmet ug mask ang mga suspek.
Nasayran nga ang biktima nga si Anthony ang bodyguard ni Barangay Kapitan Jeprox Yumang samtang si Michael ang bag-ong graduate sa drug rehabilitation sa syudad.
Sa imbestigasyon sa kapulisan, nasayran nga si Michael ang target sa mga suspek og nadamay lamang ang amahan human nga gisalipdan kini human nga namusil ang suspek 13 ka higayon nga nagresulta sa kamatayon sa mag-amahan.
Nasayran nga sa nangaging adlaw gipusil patay sa 2 ka suspek si Baluan Barangay Kagawad Omar Mamalumpong samtang sakay ang biktima sa iyang motorsiklo.
