GENSAN– Gustong mapanubag si Kapitan Jeprox Yumang sa San Isidro ang mga responsable sa paglabay sa bag-ong himugso nga mga bata sa ilang barangay.
Angayang makasohan ang inahan o mga nagtabang sa gihimong dakong salaod aron dili na usbon.
Kahibaloan nga adunay tanyag ang Barangay nga P20,000 reward sa makatudlo og makahatag og impormasyon bahin sa gilabay nga bata.
Nanghinaot na lang si Kapitan Yumang nga dili na kini masundan taliwala nga siya nagtuo nga basin adunay abortionist nga ginadangpan sa mga gustong magpatagak sa ilang gisabak.
Kahinumdoman nga sa milabay nga adlaw nakita ang bag-ong himugso nga bata nga gibanabana nga naa sa unom o pito ka bulan sa sagbotan sa Purok 17 Brgy. San Isidro kung diin giputos sa orange nga eco bag.
Sumala ni Kapitan Yumang nga kini nga kaso ang ikaupat nga higayon na ning tuiga nga tanan ang gihatagan og disenteng lubong.
