GENSAN- Nakasinati pag-usab og kusog nga linog ang General Santos City ug mga kasikbit nga lugar sa Sarangani ug ubang bahin sa SOCCSKSARGEN alas 11:49 sa gabii, diin natala ang magnitude 6.5 nga linog.
Sumala sa Philippine Institute of Volcanology and Seismology (PHIVOLCS), ang sentro sa linog nahimutang sa Balut Island, Municipality of Sarangani, Davao Occidental, ug adunay giladmon nga 10 kilometro.
Nabatyagan ang Intensity V sa Kiamba, Sarangani; Intensity IV sa Malapatan, Maasim ug Maitum,Sarangani, General Santos City, Tupi ug T’boli, South Cotabato; Intensity III sa Santa Maria, Davao Occidental, Malungon, Sarangani, ug Santo Niño, South Cotabato.
Sa wala pa kini, alas 9:15 sa gabii, nabatyagan usab ang usa ka magnitude 5.0 nga aftershock, nga nakadugang sa kabalaka sa mga residente, ilabina kadtong naapektuhan sa nag-unang linog.
Nahinumduman nga hangtod karon, adunay mga pamilya nga wala pa makabalik sa ilang mga panimalay ug nagpabilin gihapon sa mga evacuation center human sa magnitude 7.8 nga linog niadtong Hunyo 8.
Sa pagkakaron, wala pay opisyal nga report sa kadaot o mga biktima nga nalambigit sa sunod-sunod nga mga pagtay-og nga nasinati kagabii, apan padayon ang monitoring sa mga lokal nga awtoridad ug sa PHIVOLCS.
