Posibleng maabli pag-usab ang Strait of Hormuz human sa pag-uswag sa negosasyon tali sa Iran ug Oman.
Matud sa usa ka opisyal sa Estados Unidos, gilauman nga magkasinabot ang duha ka nasod aron mabalik ang normal nga paglabay sa mga oil tanker sa maong importanteng agianan sa lana sa kalibotan.
Kung maabot ang kasabutan alang sa gawasnong paglayag sa mga komersyal nga barko, andam ang Estados Unidos nga tangtangon ang blockade niini sa mga pantalan sa Iran, apan magdepende kini sa pagtuman sa Iran sa mga napagkasabutan.
Sa wala pa magsugod ang gubat niadtong Pebrero 28, gibanabana nga usa sa matag lima ka baril sa lana sa kalibotan moagi sa Strait of Hormuz.
Tungod sa panagbangi, nagpataw ang Iran og bayad sa mga oil tanker ug miatake sa pipila ka barko nga miagi niini, nga nakaapekto sa suplay ug nakapadugang sa presyo sa enerhiya ug inflation.
Samtang, mipirma ang Saudi Arabia, Pakistan ug Turkey og joint defense agreement sa Mecca aron palig-onon ang ilang kooperasyon sa depensa.
Padayon usab ang paningkamot sa Estados Unidos nga mapahunong ang panagbangi tali sa Israel ug Hezbollah sa habagatang Lebanon.
Gipanalipdan usab ni Iranian President Masoud Pezeshkian ang negosasyon uban sa Estados Unidos, ug matud niya, daghang taas nga opisyal sa militar sa Iran ang misuporta sa pakigsabot aron matapos na ang gubat.
