Gipahibalo sa legendary singer nga si Stevie Wonder ang iyang US ug European tour.
Sumala sa iyang social media account, ang maong tour ipahigayon isip kabahin sa ika-50 nga anibersaryo sa iyang album nga “Songs in the Key of Life,” nga gipagawas niadtong 1976. Magsugod ang ‘18-city tour’ sa Birmingham, England sa umaabot nga Oktubre 13.
Molibot ang ‘25-time Grammy winner’ sa nagkalain-laing siyudad sa Europe sama sa Paris, Copenhagen, Amsterdam ug London.
Samtang, magsugod ang iyang US tour sa Madison Square Garden sa New York sa Nobyembre 19.
Maghimo usab siya og mga concert sa Chicago, Washington D.C. ug Detroit, ug tapuson ang tour sa Intuit Dome sa Los Angeles sa Disyembre 19.
Human mapagawas ang “Songs in the Key of Life” niadtong September 1976, nanguna kini sa mga music chart sulod sa 14 ka semana. Ang mga kanta niini nga album sama sa “I Wish” ug “Sir Duke” nakasulod usab sa unang pwesto sa mga chart.
Nakadaog ang album sa “Album of the Year” sa Grammy Awards ug sa ulahi gidugang sa Library of Congress’ National Recording Registry. Ang 76-anyos nga si Stevie Wonder natawo sa Saginaw, Michigan niadtong 1950, ug sa edad nga 11 anyos nakuha siya sa Tamla label sa Motown.
Sa edad nga 13 anyos, nakasulod sa Billboard Hot 100 ang iyang kanta nga “Fingertips.” Niadtong 1989, gipasulod siya sa Rock & Roll Hall of Fame.
Niadtong 2024, sa iyang ika-74 nga adlawng natawhan, gihatagan siya og Ghanian citizenship sa kanhi presidente sa Ghana nga si Nana Akufo-Addo.
