GENERAL SANTOS CITY – Lauman nga subling magpahigayon ug stations of the cross ang liderato sa Police Regional Office 12, sama sa naandan nilang himuon matag tuig atul sa Biyernes Santo.
Kini ang gikumpirma ni Patrolman Jose Dullano III, sa Police Regional Office (PRO) 12 Public Information Office.
Nasayran nga miaging tuig, wala gihimo ang naandan nga paghakwat sa pinakadako nga krus sa police regional director gumikan dili katoliko si Gen. Marcelo Morales.
Apan matud ni Patrolman Dullano, lauman nga himuon kini ning tuiga ni Police Brigadier General Eliseo Tam Rasco.
Samtang, isip kabahin gihapon sa pakigduyog sa PRO-12 sa Semana Santa, nagpahigayon usab matud pa ug recollection ang PRO-12, hilabi na alang sa mga pulis nga gaatubang ug disciplinary proceedings ug na-assign sa Regional Personnel Holding and Accounting Unit kon RPHAU.
Duha ka adlaw kining gipahigayon sugod kaniadtong Biyernes, sa tumong nga maka-recollect ug makahinuklog ang mga nasampit sa ilang nahimong salaod.
