Opisyal na nga gipaubos sa state of calamity ang tibuok dakbayan sa Manila luyo sa mga pagbaha nga nasinati tungod sa walay hunong nga pag-ulan.
Sa special session sa Manila City Council, nagkasabot sila nga ipatuman ang deklarasyon kagahapong adlawa.
Kini aron mahatagan dayon ang mga barangay sa dakbayan sa ilang calamity fund aron mahatagan og hinabang sa ilang mga konstituwente.
Kini subay sa hangyo sa kasamtangang mayor sa Manila tungod sa dili malalis nga epekto sa pag- ulan sa dakbayan. Samtang, gimando sa kagamhanan sa dakbayan ang pagpadayon sa declogging operations sa mga drainage nunot sa nagpadayong pagbaha.
Diin personal nga gisusi ni Mayor Francisco ‘Isko’ Moreno Domagoso ang mga karsada nga nalubog pa sa baha sama sa Taft Avenue. Matod niya nga nakigtambayayong ang Metropolitan Manila Development Authority kon MMDA sa nagpadayong pagpanglimpyo sa mga drainage sa dakbayan.
Sa laing bahin, gipasalig ni Mayor Isko Domagoso nga ‘passable’ o maagian sa nagkadaiyang matang sa sakyanan ang mga dalan sa Manila nga gilunopan sa baha sukad niadtong milabay nga mga adlaw.
