Gipasalig sa Social Security System (SSS) nga ang pundo sa pensyon para sa mga miyembro niini magpabilin nga luwas ug lig-on, lakip na sa umaabot nga mga henerasyon.
Kini human ang ahensya nakatala og makasaysayanong pagtabok sa P1 trilyon nga marka sa reserbang pundo niini niadtong 2025.
Sumala sa report ni Finance Secretary ug Social Security Commission (SSC) Chair Frederick Go, ang net income sa SSS sa miaging tuig miabot sa P142.97 bilyon—58.4% nga mas taas kaysa sa datos niadtong 2024.
Ang kinatibuk-ang asset sa ahensya misaka usab ngadto sa P1.26 trilyon, nga giisip nga usa ka record-breaking nga pinansyal nga performance.
Sumala ni Go, ang gipalig-on nga pundo usa ka garantiya nga kini makapondo sa mga benepisyo sa mga pensyonado sa dugay nga panahon.
Subay sa direktiba ni Presidente Ferdinand R. Marcos Jr., ang lig-on nga pinansyal nga posisyon sa SSS gamiton aron masiguro ang padayon nga serbisyo, lakip ang paspas nga pagproseso sa mga Micro Loans ug Calamity Loans para sa mga miyembro nga nanginahanglan.
