Gihingusgan sa Social Security System (SSS) nga dili angay hunongon ang pagbayad sa kontribusyon sa mga government benefits, lakip na ang SSS contributions, sumala kang Noel Nacion, Communications Officer sa SSS Mindanao South II Division.
Matud ni Nacion, adunay ubang pamaagi nga mahimong gamiton sa mga miyembro kung makasinati og kalisod sa pinansyal, sama sa pag-avail og loan programs imbis nga ihunong ang kontribusyon. Matud niini nga ang padayon nga pagbayad sa kontribusyon importante aron mapadayon ang eligibility sa mga benepisyo sama sa sickness, maternity, disability, ug retirement pension.
Gi-usab sa SSS nga kung adunay mga miyembro nga naay existing loan, dili ang kontribusyon ang angay hunongon, kundili ang gobyerno o SSS mismo mao’y mahimong magpatuman og moratorium sa loan repayment. Kini nagpasabot og temporaryong paghunong sa pagbayad sa utang, samtang ang kontribusyon padayon gihapon.
Sumala pa sa SSS, kasagarang ipatuman ang moratorium panahon sa kalamidad sama sa bagyo, linog, ug baha, o kaha kung adunay national emergency sama sa pandemya.
Gipasabot sa ahensya nga ang maong lakang gituyo aron matabangan ang mga miyembro sa panahon sa krisis, apan dili kini maglakip sa pagsuspinde sa kontribusyon, kay kini ang pundasyon sa kaugmaon sa ilang benepisyo.
