Isip kabahin sa ika-68 nga anibersaryo, ang Social Security System (SSS) mapasigarbuhon nga naglunsad og duha ka mahinungdanong mga programa nga siguradong makabenepisyo ang mga miyembro ug mga pensiyonado.
Kini nga mga programa, gitawag og MySSS Card ug Alagang SSS Program, subay sa direktiba ni Presidente Ferdinand R. Marcos Jr. nga mas palig-onon ug palapdan pa ang social protection nga gihatag sa mga Pilipino.
Ang MySSS Card gilauman nga mopuli sa kasamtangan nga UMID card. Labaw pa sa usa ka simpleng identification card kini magsilbi nga usa ka functional ID nga adunay bahin usab sa bank account.
Tumong niini nga mahatagan og mas sayon ug mas paspas nga access ang nagkalain-laing benepisyo ug loan programs nga gitanyag sa SSS.
Dili kini limitado sa mga transaksyon sa SSS, tungod kay magamit usab kini sa pagpamalit, pagbayad sa plitehan, ug bisan sa pagbayad sa online, nga naghatag daghang mga gamit sa adlaw-adlaw nga kinabuhi.
Samtang, ang Alagang SSS Program usa ka inisyatiba nga nagtumong sa paghatag og diskwento sa mga piniling tambal alang sa mga miyembro nga nag-edad og 60 pataas.
Tumong niini nga mapauswag ang kahimsog ug kaayohan sa mga tigulang, nga kanunay nanginahanglan ug tambal alang sa lainlaing mga kondisyon.
