GENERAL SANTOS CITY- Dili makatuo si Fred Lumba, usa ka sports analyst dinhi sa dakbayan nga split decision ang engkwentro tali kang kanhi Pinoy WBC featherweight champion Mark ‘Magnifico’ Magsayo og Mexican boxer Rey Vargas.
Matud ni Lumba, ‘very close’ ang away sa duha apan alang kaniya ‘draw’ ang angayang desisyon sa mga judges ilabi nga si Magsayo ang naka- knockdown kang Vargas sa 9th round.
Apan wala miingon si Lumba nga natikasan ang Pinoy boxer.
Gibutyag niini nga angayang adunay rematch ang duha kung diin galaum siya nga daghan na og matun-an si Magsayo sa iyang pagbalik sa boxing ring.
Apan sa pamahayag ni Lumba nga daghang gibuhiang kinumo si Magsayo ang nasayang. Dugang pa ni Lumba nga angayang matun-an sa Pinoy boxer ang ‘punching combinations’ nga dakong bentaha aron makadaug sa kontra.
Ang Magsayo vs. Vargas fight ang gipahigayon sa San Antonio, Texas kaniadtong Domingo kung asa natilawan ni Magsayo ang unang kapildihan sa kamot sa Mehikanong boksingero nga si Vargas.
