Nagpadayon ang search, rescue ug retrieval operations sa Bureau of Fire Protection (BFP) Special Rescue Forces (SRF) sa mga lugar nga grabeng naapektuhan sa magnitude 7.8 nga linog sa lungsod sa Glan.
Sumala kang FSupt. Lowyn Amoyar, Acting Chief sa BFP Region XII Special Rescue Force ug Deputy Incident Commander sa operasyon, gipalig-on sa BFP National Headquarters ang local responders pinaagi sa pagdeploy sa mga SRF teams gikan sa Caraga, BARMM, Region XI ug Region XII.
Matod ni Amoyar, ang SRF team gikan sa Caraga daan nang gipahimutang sa General Santos City sukad Hunyo 8 sa wala pa sila ipadala sa Glan. Mao usab kini nga grupo nga nakarekober sa lawas sa katapusang gitaho nga namissing sa nahugno nga Savemore supermarket sa Barangay Calumpang human sa linog.
Bisan pa sa lisod nga kahimtang sa yuta ug dagkong pagdahili sa mga kabukiran, misulod ang mga rescue teams sa hilit nga mga barangay sama sa New Aklan, Congan, Calpidong ug Calabanit diin adunay mga report sa pagdahili ug mga na missing nga residente.
Giatiman sa Municipal Disaster Risk Reduction and Management Office ang paggiya sa mga rescuers aron mas dali nilang maabot ug matultolan ang mga lugar nga kinahanglan pang susihon ug tabangan.
