Miduso og bag-ong petisyon sa Office of the Ombudsman si Davao del Norte 1st District Rep. Pantaleon Alvarez ug Citizens Crime Watch.
Katuyoan niini nga hangyuon ang Ombudsman nga pahamtangan og preventive suspension si House Speaker Ferdinand Martin Romualdez, Majority Leader Mannix Dalipe, Rep. Zaldy Co ug Rep. Stella Quimbo.
Una niini, gisang-at na usab sa grupo ang 12 ka counts of falsification of legislative documents batok sa nahisgutang mga opisyal sa Kamara tungod sa giingong pag-insert sa P241-billion 2025 national budget.
Ang mga petitioner niinsistir nga kinahanglang suspensuhon ang maong mga opisyal aron dili maimpluwensyahan ang nagpadayong imbestigasyon.
Matod nila nga seryosong mga isyu ang dishonesty, oppression, ug grave misconduct, mao nga igo na kini nga basehan aron masuspenso ang mga akusado.
Gitataw ni Alvarez nga dili kini pareha sa ilang gisang-at kaniadto sa anti-graft body ug posibleng kini maoy unang aksyon nga himuon alang sa dagan sa lawom nga imbestigasyon.
