Ipinagmalaki na iniulat ni House Speaker Faustino “Bojie” Dy III na nakapasa ang Kamara ng 17 sa 52 prayoridad na panukala ng Legislative-Executive Development Advisory Council (LEDAC) sa kabila ng tumitinding hamong pang-ekonomiya at pandaigdig.
Sa kanyang talumpati bago mag-adjourn ang Kongreso para sa Holy Week break, pinuri ni Dy ang kolektibong pagsisikap ng mga mambabatas, sa pangunguna ng liderato ng Kamara at ni Majority Leader Ferdinand Alexander “Sandro” A. Marcos, sa pagpapanatili ng legislative momentum.
Ayon kay Dy, dumarating ang mga tagumpay sa panahong may malaking global uncertainty, lalo na ang epekto ng tensyon sa Middle East na nagpapataas sa presyo ng langis, mga bilihin, at nakaaapekto sa kabuuang katatagan ng ekonomiya at kabuhayan ng mga Pilipino.
Bilang tugon, binigyang-diin niya ang pagpasa ng House Bill 8418 na nagbibigay kapangyarihan sa Pangulo na bawasan o suspendihin ang excise tax sa langis kung kinakailangan upang mapigilan ang pagtaas ng presyo. Aniya, inuna ang panukalang ito matapos itong sertipikahang urgent.
Isinulong din ng Kamara ang mahahalagang reporma sa edukasyon, kabilang ang mga amyenda sa Universal Access to Quality Tertiary Education Act at pagpapalakas ng Presidential Merit Scholarship Program upang mas masuportahan ang mga estudyante at maihanda ang lakas-paggawa ng bansa.
Naipasa rin ang Digital Payments Act na naglalayong pabilisin ang digitalisasyon sa pamahalaan, bawasan ang red tape, at pataasin ang transparency sa mga transaksyon ng gobyerno.
Samantala, umusad din ang Anti-Political Dynasty bill matapos ang serye ng konsultasyon sa Luzon, Visayas, at Mindanao, at natapos na ang deliberasyon nito sa plenaryo.
Binigyang-pugay ni Dy ang mga mambabatas, opisyal, at kawani ng Kamara sa kanilang dedikasyon, at iginiit na ang mga tagumpay na ito ay patunay ng masipag na paglilingkod at sama-samang ambag para sa kapakanan ng sambayanang Pilipino.
