GENERAL SANTOS CITY- Nakadayeg ang spar mates ni eight division world champion ug Sen. Manny Pacquiao humann nila kini makaatbang sa sparring sessions kagahapon sa hapon.
Subling nagpahigayon ug unom ka rounds sa sparring sessions ang fighting senator sa iyang Wild Card Gym, kung asa tigduha ka rounds silang Australian boxer George Kambosos Jr, ug ang duha ka Bohol boxers nga silang Arnel Tinampay ug Ricky Sismundo.
Sa pakighinabi sa Bombo Radyo, gibutyag ni Sismundo nga napamatud-an na gayud niini kon unsa kakusog ang mga kinumo ni Pacquiao, ug ang dili katupngan nga kapaspas ug kaabtik niini.
Ug gani, nakaluhod siya sa ilang panag-atbang ni Pacquiao, human naigo ang iyang apapangig ug lawas.
Kahinumduman nga midugo usab ang ilong miaging adlaw ni Kambosos, samtang nakaangkon usab ug bukol sa agtang si Tinampay, human maka-sparring ang fighting senator.
Samtang, gawas sa sparring, nag-shadow fight usab si Pacquiao, ug pipila ka rounds sa punching bag, double end, speed ball, ug uban pa.
Kahibaluan nga padayong nagmadasigon ang Pinoy ring icon sa iyang pagbansay, hilabi na karon nga anaa na sa heavy training, alang sa umaabot nga away kang Lucas Matthysse sa Hulyo 15.
