GENSAN- Gipahigayon sa Sangguniang Panlungsod sa General Santos City ang ika-38 nga Regular Session sa gawas sa City Hall ning adlawa human sa magnitude 7.8 nga linog nga miigo sa rehiyon niadtong Hunyo 8.
Gihimo ang sesyon sa usa ka temporaryong open-air setup sa parking area sa City Hall tungod kay nadaut ang SP Building sa maong linog.
Bisan pa sa nahitabo, gipadayon sa Sangguniang Panlungsod ang ilang sesyon aron hisgutan ang mga mahinungdanong lakang nga may kalabutan sa pagresponde sa kalamidad, relief operations, ug rehabilitasyon sa siyudad ug sa kasikbit nga mga lugar.
Usa sa mga resolusyon nga giaprobahan mao ang paghatag og awtoridad sa lokal nga panggamhanan sa pagdawat og mga donasyon alang sa mga residente nga apektado sa linog, subay sa mga probisyon sa balaod.
Matud pa sa konseho, bisan pa sa mga hagit nga dala sa kalamidad, dili mahimong mapahunong ang ilang mga buluhaton aron masiguro ang padayon nga paghatag og serbisyo sa katawhan.
