Giingon ni Senate President Sherwin Gatchalian nga siya gihapon ang angay nga mopangulo sa impeachment trial ni Sara Duterte, subay sa naglungtad nga Senate Rules of Procedure on Impeachment Trials.
Matud ni Gatchalian, klaro sa mga lagda sa Senado nga ang Senate President maoy mahimong presiding officer sa tanang impeachment trial, gawas lamang kon ang giatubang sa pagtaral mao ang Presidente sa nasod.
Apan, iyang giila nga adunay probisyon sa giusab nga impeachment rules nga nagtugot sa mga senator-judges sa pagbotar kon gusto nilang magtudlo og laing presiding officer. Matud pa niya, kon mao kana ang desisyon sa kadaghanan sa mga senador, andam siyang motuman sa maong hukom.
Gipasalig usab ni Gatchalian nga andam na ang Senado alang sa pagsugod sa impeachment trial karong Lunes. Dugang pa niya nga nahuman na ang tanang security preparations, lakip ang contingency plans sama sa backup power supply aron masiguro nga walay mahimong babag sa pagpadayon sa pagdungog.
Gilauman usab niya nga motambong ang tanang mga senador sa pag-abli sa pagtaral, lakip si Sen. Alan Peter Cayetano. Apan, iyang giingon nga posible nga adunay pipila ka mga senador nga dili makatambong personal tungod sa ilang giatubang nga mga kaso.
