Patay sa pagpamusil ang South African boxer nga si Zolani Tete.
Si Tete usa ka kanhing WBO bantamweight ug IBF junior-bantamweight champion.
Gipusil siya sa wala mailhing mga suspek samtang pasulod sa iyang balay sa lungsod sa Mdantsane, South Africa.
Naangol usab ang iyang kauban samtang paspas nga mikalagiw ang wala mailhing mga suspek.
Ang 38-anyos nga boksidor nakig-atubang na kaniadto kang John Riel Casimero niadtong Nobyembre 2019, diin midaog ang Pinoy boxer sa WBO 118-pound title sa dula nga gihimo sa England.
Adunay rekord si Tete nga 29 ka daog ug upat ka kapildihan, lakip ang 22 ka knockout.
Si Casimero lamang ang Pinoy boxer nga nakapildi kang Tete.
Lakip sa mga iyang napildi nga mga boksidor mao sila Arthur Villanueva, Rexon Flores, Eduard Penerio, Richard Garcia ug Jether Oliva.
