Nagpahibalo si Senate President Vicente “Tito” Sotto III kagahapon nga iyang hangyoon si Presidente Ferdinand Marcos Jr. nga i-certify ang Senate Bill 1215 o ang balaudnon alang sa Independent People’s Commission (IPC) nga dalion aron mapadali ang pag-aproba niini.
Matod ni Sotto, gitumong sa maong balaodnon nga himuong permanenteng balaod ang kasamtangang executive order sa Presidente nga nagtukod sa IPC.
Dugang pa nga giklaro sa senador nga ang IPC dili lang mag-review sa mga proyekto sa Department of Public Works and Highways (DPWH), kondili lakip na sa mga programa sa ubang ahensya sama sa Department of Agriculture, Department of Health, Department of Education, ug uban pa.
Nasayran nga ang maong balaudnon nag-ingon nga ang IPC mohimo og komprehensibong imbestigasyon sa tanang gikatahong anomaliya sama sa kurapsyon, ghost projects, overpricing, ug paggamit sa substandard nga materyales, sa mga proyekto sa nasudnong kagamhanan, local government units, ug government-owned corporations.
Ang IPC hatagan usab ug gahum sa pag-ila sa mga nalambigit gikan sa publiko o pribadong sektor ug pagrekomenda sa mga kasong kriminal, civil, o administratibo batok kaniadtong mapamatud-ang sad-an.
