GENSAN – Supak si South Cotabato 1st District Rep. Pedro Acharon Jr. sa sugyot balaodnun nga subling isibog ang barangay ug SK elections nga gitakda na sa Mayo 14.
Sa pakighinabi sa Bombo Radyo, gibutyag ni Cong. Acharon nga makaduha ka higayon nang nasibog ang naasoy’ng piniliay, ug nahatagan na ug paigo ug taas-taas nga panahon ang mga kasamangang barangay officials, hinungdan nga angayang hatagan na usab ug kahigayunan ang katawhan nga mupili sa mga buot nilang mahimong lider sa mga barangay.
Hinuon, kon maayo matud pa ang mga opisyal, sigurado matud pang makabalik sila sa pwesto.
Gawas niini, kulang na usab matud pa ang panahon alang sa pagtuki sa maong sugyot-balaodnun luyo nga naaprubahan na sa committee level.
Kini gumikan muagi pa kini sa plenaryo nga muagi pa ug second ug third reading, dayon sa Senado.
Hinungdan nga alanganin na kining maapas, hilabi na nga mag-recess na sila ang Kongreso sa Marso 22 ug sa Mayo 13 pa mubalik.
Hinuon, wait and see na lamang matud pa sa mga mahitabo, gumikan mahimo matud pang may mamahimong intervention si Pangulong Duterte.
Apan alang kaniya, anaa sa 70 % nga mahinayon gayud ang piniliay.
