Giduso ni Parañaque 2nd District Representative Brian Raymund Yamsuan ang dinaliang pagpasa sa iyang balaudnon nga nagtinguha sa pagpalambo sa kahanas sa mga tinugyanan sa balaod sa pag-imbestigar sa mga krimen pinaagi sa paggamit sa moderno ug siyentipikong pamaagi sama sa forensic science.
Matod ni Yamsuan, ang iyang House Bill (HB) 2244 mosuporta sa mga inisyatiba sa Department of the Interior and Local Government (DILG) sa pagpalig-on sa mga lakang sa pagpugong ug pagtubag sa krimen.
Importante usab nga kon mahitabo ang krimen, hanas ang kapolisan sa paggamit sa modernong mga pamaagi sa pagkuha ug pagtuki sa mga ebidensiya.
Gihatagan og gibug-aton sa Kongresista nga tukma sa panahon ang maong balaodnon ilabi na karon nga nag-uswag na usab ang forensic science sa nasud, sama sa pagtukod sa National Forensics Institute sa UP Manila niadtong Hunyo.
Si Yamsuan miingon nga panahon na nga ilisan ang mga daan nga pamaagi sa imbestigasyon ug kinahanglang mosubay sa paspas nga paglambo sa siyensya ug teknolohiya.
Matod sa magbabalaod, ang pagpasa sa HB 2244 kabahin sa komprehensibong reporma sa sistema sa hustisya sa nasud ug importanteng lakang aron mapalig-on ang kapabilidad sa pagpatuman sa balaod sa modernong panahon.
