Giingong gikansela ni South Korean President Yoon Suk Yeol ang iyang gikatakdang pagbisita sa National Assembly kagahapon kung asa nag-atubang siya og impeachment proceedings human napakyas ang iyang pagsulay sa pagpatuman sa martial law human gi-withdraw dayon niadtong Martes sa gabii, Disyembre 3.
Adunay wala pa makumpirma nga mga taho nga ang presidente sa SoKor moadto sa parliament aron mangayo og pasaylo ug mo-resign.
Apan gihimakak dayon sa Presidential Office ug niingon nga walay plano si Pres. Yoon nga moadto sa National Assembly.
Bisan pa niini, ang mga membro sa Parliament nagpabilin sulod sa building nga nagbarog ug nagbarikada nga nagkupot ug mga plakard ug nagsinggit og impeachment samtang ang dakong grupo sa nasuko nga mga magbabalaod sa oposisyon nag-uban sa entrada sa nasudnong asembliya.
Gikatakda ang botasyon karong adlawa, Disyembre 6 sa impeachment ni Pres. Yoon.
Kung si Yoon mokanaog sa katungdanan o ma-impeach, masuspinde siya samtang naghulat sa hukom sa Constitutional Court, nga kinahanglang hukman sulod sa 180 ka adlaw. Sa kasamtangan, si SoKor Prime Minister Han Duck-soo maoy mobarog isip acting president kon munaog sa katungdanan si Pres. Yoon.
