Gibasura sa kapulisan sa South Korea ang reklamong gisang-at batok sa aktor nga si Kim Soo Hyun may kalabotan sa alegasyon nga nakigrelasyon matod siya sa namatay nang aktres nga si Kim Sae Ron samtang menor de edad pa kini.
Base sa report sa Yonhap News Agency, nakadesisyon ang Seoul Seongdong Police Station nga dili na ipadayon ang kaso tungod sa kakulang sa ebidensya.
Nagsugod ang isyu human giakusahan sa pamilya ni Kim Sae Ron ang aktor nga nakigrelasyon matod siya sa aktres sa panahon nga menor de edad pa kini.
Misamot ang kontrobersiya human nagpagawas og mga alegasyon ang YouTube channel nga HoverLab Inc. batok kang Kim Soo Hyun.
Niadtong Abril 2025, nagsang-at usab og civil lawsuit ang aktor batok sa pamilya ni Kim Sae Ron ug sa mga nagdumala sa maong YouTube channel.
Gipanghimakak pag-ayo ni Kim Soo Hyun ang mga akusasyon. Matud niya, nagkarelasyon sila ni Kim Sae Ron sulod sa kapin usa ka tuig, apan nahitabo kini sa panahon nga pareho na silang hustong edad.
Gipanghimakak usab sa aktor ang mga alegasyon nga adunay kalabotan siya sa pagkamatay sa aktres.
Namatay si Kim Sae Ron niadtong Pebrero 2025 sa edad nga 24.
Nailhan si Kim Sae Ron sa mga palabas nga “A Brand New Life” ug “The Man From Nowhere,” ingon man sa mga teleserye nga “Hi! School Love On,” “Can You Hear My Heart,” ug “The Queen’s Classroom.”
Samtang, si Kim Soo Hyun usa sa labing iladong aktor sa South Korea nga misikat pinaagi sa mga hit drama nga “Queen of Tears,” “It’s Okay to Not Be Okay,” ug “My Love from the Star.”
