Nagdumili ang Department of Justice sa pagtubag sa posibilidad nga madala dayon si Sen. Bato Dela Rosa ngadto sa International Criminal Court kung siya madakpan.
Sumala ni Justice Secretary Fredderick Vida, ang maong butang anaa na karon sa ‘operational matters’ nga iyang giingon nga dili mahimong hisgutan o ipahibalo sa publiko.
Gilikayan nila ang pagkompromiso o pag-apekto sa pangunang tumong sa pagdala kang Sen. Dela Rosa ngadto sa International Tribunal.
Diin gusto sa departamento nga dad-on ang magbabalaod sa The Hague, Netherlands aron ipresenta sa korte kalabot sa kaso nga gikalambigitan ni Dela Rosa.
Giangkon usab niya nga dili pa posible nga isulti o klaruhon ang sunod nga lakang sa gobyerno sa pagproseso sa pag-aresto ug pag-turnover sa senador kung naa na siya sa mga kamot sa mga awtoridad.
Bisan ang Justice Spokesperson nga si Atty. Polo Martinez nagdumili usab sa pagkumpirma o paghatag og tubag bahin sa proseso nga mahitabo kung madakpan ang magbabalaod.
Iyang giinsistir nga dili kini mahimong ipahibalo sa publiko sa pagkakaron apan miingon nga ang pag-aresto responsibilidad sa mga ahensya sa pagpatuman sa balaod sama sa National Bureau of Investigation, Philippine National Police ug uban pa.
