GENSAN – Padayon ang pagsaka sa kaso sa HIV sa rehiyon sa SOCCSKSARGEN base sa datos sa Department of Health.
Sa pinakabag-ong update kagahapong adlawa Hunyo 16, 2025, gikasayuran nga miabot na sa kapin 3,200 ang total nga kaso sukad nagsugod ang pagmonitor sa DOH sa rehiyon.
Ang labing daghang natala nga kaso anaa gihapon sa General Santos City ug South Cotabato, nga gilangkuban sa mga batan-ong lalaki nga nag-edad 15 hangtod 34 anyos.
Giila kini sa DOH nga mao ang pinakataas nga grupo nga naigo sa maong sakit.
Gipahimangnoan sa DOH-CHD SOCCSKSARGEN ang publiko nga magpabiling mabinantayon ug suportahan ang mga kampanya batok sa HIV, sama sa libreng testing, awareness drives, ug pagtambal sa mga na-diagnose nga positibo.
Gibuksan na usab ang dugang mga HIV treatment hubs sa rehiyon aron mas daghan ang matabangan.
Gihangyo sa mga otoridad nga likayan ang diskriminasyon ug hatagan ug kahayag ang kahimtang sa mga buhi nga adunay HIV.
Wala pa’y gi-anunsyo nga lokal nga health emergency sa rehiyon, apan gina-awhag sa DOH ang tanan nga magpa-test regular ug magpraktis sa luwas nga pakighilawas.
