GENERAL SANTOS CITY – Misentro sa 10-point agenda ang nahimong unod sa State of the City Address o SOCA ni Mayor Ronnel Rivera kagahapong adlawa sa hapon sa Lagao Gymnasium.
Gikabutyag nga misobra sa usa og tunga sa oras ang report sa mayor sa katawhan sa mga nahimo niya sulod sa pangatungdanan og mga kalampusan sa syudad ug ang padulngan dili lang sa iyang termino kundili sa mosunod pa nga katuigan.
Ang 10-point agenda sa SOCA sa mayor gilangkoban sa edukasyon, kahapsay ug kalinaw, mga nahatud nga health services, labor and employment, economic services and development, transportasyon, housing and community development, social welfare services, kinaiyahan og uban pa.
Nasayran nga tanang assistants ug department heads nagsul-ob og Filipiniana samtang ang ubang empleyado nagsul-ob sa ilang uniporme.
Anaa usab ang presensya sa managlahing sector gikan sa mga barangay, mga negosyante ug nasudnong ahensiya sa gobyerno.
Kahibaluan nga daghan ang nag-atang sa isyu sa transportasyon sa GenSan atol sa SOCA ni Rivera.
Gipaklaro sa mayor kung unsa ang tinuod nga istorya sa transportasyon sa syudad og unsa ang himuon sa LGU kalabot sa maong sektor nga dugay nang naatubang sa dakong problema og ang mamahimong kaugmaon niini.
Sa iyang pagpamulong, gibutyag ni Mayor Rivera nga ang LPTRP kon Local Public Transport Route Plan ug ang Comprehensive Transportation
Plano sa syudad ang usa sa mga unang lakang nga himuon aron mahatagan ug sulbad ang problema sa transportasyon.
Giklaro niini nga walay abolisyon ug walay phase out nga mahitabo. Iplastar matud pa ang tanan og walay ma-displace.
Solusyon nga base sa balaud ug gitun-an ug gikonsidera ang kahimtang sa tanang mga maapektuhan.
Gibutyag sa mayor nga gihangyo ang City Engineers Office nga magsumite sa iyang opisina og bag-ong alternatibong ruta aron mahimong prayoridad sa kalambuan sa imprastraktura sa mga sunod nga katuigan.
Sa pamahayag sa mayor nga ang tanang plano sa syudad kalabot sa transportasyon ang dili mahitabo og overnight lamang kung asa sa banabana sa mga eksperto nga nagkinahanglan og upat hangtud sa lima ka tuig aron maimplementa ang maong transport plan.
