Nakabreak og bag-ong Guinness World Record ang usa ka siyudad sa Turkey human nakaluto og 1,807 gallons o kapin 6,800 ka litro nga ‘baked beans’, nga bugti sa gibana-banang 15,000 ka lata sa maong pagkaon.
Ang maong rekord gihimo niadtong Agosto 22 pinaagi sa pagtinabangay sa Kelkit Chamber of Commerce and Industry, Gümüşhane Governorship ug Kelkit Municipality.
Ang Kelkit Şeker Fasulyesi, usa ka klase sa ‘baked beans’, iladong lokal nga produkto sa maong lugar. Matud sa mga organizer, dakong kalampusan kini alang sa Kelkit, Gümüşhane ug sa ilang rehiyon tungod kay napaila sa ‘international level’ ang ilang lokal nga produkto ug kabilin sa ilang tradisyon sa pagpanguma.
Ang siyudad karon maoy naghupot sa rekord alang sa pinakadakong kaldero sa ‘baked beans’, nga milabaw sa kanhing rekord nga 1,479.36 gallons.
Matud pa sa organizers, labing ilang gipasigarbo ang pagtinabangay sa mga mag-uuma, mga grupo sa mga tigluto, engineers, food-safety professionals, sponsors, public institutions ug mga volunteers aron makab-ot ang maong rekord.
