GENERAL SANTOS CITY – Posibleng dili gihapon mapatuman ang silot kamatayon nga gipanaog sa korte sa nasud Kuwait batok sa mag-asawa nga amo ni Joanna Demafeliz, ang OFW nga gipatay ug nakaplagan sulod sa freezer, didto sa nasampit nga nasud.
Kini ang gibutyag sa Bombo Radyo ni Atty Rogelio Garcia, inilang abugado sa dakbayan, hilabi na gumikan dili musugot ang Lebanon kung asa gikan ug kasamtangang nabilanggo ang amo nga lalaki ni Demafeliz nga si Nader Essam Assaf, ug ang nasud Syria kung asa usab karon nabilanggo ang suspek nga misis niini nga si Mona Hassoun, nga i-extradite ang duruha gikan sa tagsa nila ka nasud.
Matud ni Atty Garcia nga ug dili pwedeng ipatuman sa usa ka nasud ang hukom o desisyon gikan sa laing nasud. Kini gawas na lang kon ipaagi sa Interpol aron dakpon ang duha ug dal-on sa Kuwait, apan depende gihapon sa kasabutan tali sa ilang mga nasud.
Hinungdan nga nakadepende matud pa sa nasud Kuwait kon unsa ang ilang himuong pagpaningkamot, nga magpahigayon ug diplomatic effort aron makuha ang mag-asawa nga akusado, ug mapatuman ang silot, ug mahatagan ug katarungan ang kamatayon ni Demafeliz.
