Nitaliwan na ang Australian model nga si Lucy Markovic sa edad nga 27.
Sumala sa iyang ahensya ang Elite Model Management, usa ka katingad-an nga kahimtang sa utok ang hinungdan sa iyang kamatayon.
Nailhan si Markovic sa dihang miapil siya sa “Australia’s Next Top Model” diin siya mitapos sa runner-up human mapildi ni Britanny Beattie niadtong 2015.
Tulo ka semana sa wala pa ang iyang kamatayon, gipaambit niya sa iyang social media account nga ipa-opera siya sa brain arteriovenous malformation (AVM).
Ang AVM kay usa ka matang sa blood vessel tangle nga mahimong moresulta sa kadaot sa utok ug stroke.
Gihulagway pa niini nga ang maong malformation sama ra sa gidak-on sa golf ball diin makasinati kini og mga seizure.
Mibubo ang mga pahasubo gikan sa mga suod nga higala ug kaubang mga modelo.
