GENERAL SANTOS CITY – Commitment na lang ang gipaabot aron ma-turnover na sa Lanton City Jail ang usa ka sikad driver nga nanglugos sa 11-anyos nga pasahero.
Kini human nakasuhan na ug rape ang suspek nga giilang si Jetro Rosete, 23-anyos, residente sa Brgy Fatima ning dakbayan.
Kahinumduman nga misakay ang biktima sa sikad sa suspek aron muuli sa Brgy Mabuhay gikan sa ilang tulunghaan.
Apan gituyuk-tuyok kini sa suspek hangtod nga nakaabot sa kamanggahan sa Brgy Conel, kung asa matud pa niini gihimo ang pagpanglugos.
Human gihimo ang krimen, gihatod matud pa sa suspek ang biktima sa ilang panimalay.
Apan mihilak matud pa kini ug gisugilon nga gilugos siya, hinungdan nga gigukod sa iyang amahan ang driver, kauban ang uban pang mga driver sa lugar.
Dihang ilang naabtan, misulay matud pa ug sukol ang suspek, ug may dala pang hait nga hinagiban, hinungdan nga ilaha na lamang gitabangan ug kulata.
Sa interview sa Bombo Radyo, giangkon sa suspek ang gihimo, ug gibutyag nga midulom ang iyang panan-aw tungod sa kagutom, hinungdan nga nahimo ang sa naingon. Sa pagkakaron nagpabilin sa San Isidro Police Station ang nasampit nga suspek.
