GENERAL SANTOS CITY – Dako ang pagkalugi ang nasinatian karon sa mga anaa sa aquaculture industry.
Kini ang gibutyag sa Bombo Radyo GenSan ni kanhi City Councilor Elizabeth Bagonoc, usa sa mga producer og pasayan sa syudad.
Matud pa niini nga apektado pagmaayo ang shrimp industry ning panahuna dungan sa nasinatiang krisis tungod sa coronavirus disease 2019.
Gibutyag ni Bagonoc naglisod ang mga negosyante sa pag-dispose sa ilang mga pasayan karong gi-implementar ang enhance community quarantine kon ECQ.
Sa pamahayag pa sa kanhi konsehal una gipatuman sa gobyerno ang ECQ, hilabihan kadaghan ang ilang nga binuhing pasayan pagpangandam unta alang sa Semana Santa kung asa gilauman na nila daan nga kusog ang baligya sa maong produkto hilabina sa Kauluhan.
Apan karong naabtan sila sa ECQ, naglisod na sila sa pagbaligya niini hilabina karon nga usa na lang ang gabiyahe nga cargo plane sa dakbayan paingon sa Manila.
Naglisod usab sa pagbawi sa ilang mga nagasto tungod limitado na lang ang pagpadala og pasayan kung asa anaa na lang sa 400-800 kilos kausa sa kada semana layo ra kaayo kaniadto nga 2-3 metriko tonelada kada adlaw.
Gibutyag ni Bagonoc, dili lang sila ang nagbuhi og pasayan sa GenSan apan daghan usab sa entiro Region 12 hinungdan aron makabawi gamay sa ilang negosyo, gibagsak nila ang presyo kaysa mamatay na lang sa mga fishpond og dili na hinuon mapuslan.
Nasayran nga anaa sa P180 ang kada kilo sa pasayan.
