Magpasundayag sa Cebu ang iconic girl group nga SexBomb Girls alang sa ilang reunion concert nga “Get Get Aw” sa Disyembre.
Gikatakdang ipahigayon ang maong concert sa SM Seaside Cebu Arena sa Disyembre 11, diin gipaabot ang pagdagsa sa ilang mga fans.
Sa pagkakaron, wala pa gipagawas ang detalye sa ticket prices ug ticket selling, busa gihangyo ang mga fans nga maghulat sa opisyal nga anunsyo.
Una nang nag-reunion ang SexBomb Girls alang sa usa ka concert sa Araneta Coliseum niadtong Disyembre, apan tungod sa dakong panginahanglan sa tickets, nagpadayon sila sa pagpasundayag sa dugang mga shows.
Nakaapil usab ang grupo sa ilang world tour diin ilang naadtuan ang pipila ka siyudad sa Australia ug Estados Unidos.
Gipahibalo usab kaniadto ni Rochelle nga nag-andam ang grupo og bag-ong mga proyekto alang sa ilang fans, lakip ang bag-ong musika ug documentary series, samtang nakapagawas usab sila og ‘coffee table book’ bahin sa ilang reunion.
Nailhan ang SexBomb Girls sa ilang mga dance hits sama sa “The Spaghetti Song” ug “Halukay Ube,” ug ang gipagawas usab karong bulana nga ilang bag-ong single nga “Mama Mama.”
