GENERAL SANTOS CITY – Subling nagpahimangno sa publiko ang Seventh-day Adventist Church kontra sa KAPA COMMUNITY MINISTRY INTERNATIONAL INC. kon “KAPA” (KABUS PADATUON).
Base sa gipagawas nga ‘Notice to public” sa Seventh-day Adventist Church didto sa lungsod sa Davao, ang ilang simbahan o ang bisan unsang mga ahensya ug mga institusyon niini dili konektado o adunay relasyon sa bisan unsa nga paagi sa usa ka kompaniya nga nagnegosyo ubos sa ngalan sa KAPA.
Si Joel Apolinario, ang founder sa KAPA, dili usa ka pastor, ministro o trabahante sa Seventh-day Adventist Church o sa bisan asa nga mga ahensya ug institusyon niini nga sukwahi sa unsay gipakaylap sa palibot.
Busa nagpasidaan sa publiko nga ang simbahan dili manubag o responsable sa bisan sa unsang mga transaksiyon nga gisudlan ni Apolinario.
Angayang masayran usab nga ang Seventh-day Adventist Church wala magtuo nga ang ‘Baptism of the Holy Spirit’ mamahimong madawat sa tabang sa salapi.
Dugang pa, ang simbahan adunay katungod nga ipatuman ang tanan nga posibleng legal nga mga aksyon alang sa bisan unsang mga kadaot nga mahimong hinungdan sa dili awtorisadong paggamit sa ngalan niini sa ubang mga tawo ug sa uban.
Ang ‘Notice to public’ gipirmahan ni Roger O. Caderma, Presidente, Danielo D. Palomares, Executive Secretary ug Chemuel U. Almocera, Treasurer.
