Wala matod pa’y gihimo nga lakang ang Senado aron masulbad ang isyu sa partisipasyon nila Senators Jinggoy Estrada ug Rodante Marcoleta sa impeachment trial batok kang Bise Presidente Sara Duterte.
Matud ni impeachment court spokesperson Atty. Reginald Tongol, gisulti na ni Presiding Officer Francis “Chiz” Escudero nga dili ang impeachment court ang hustong dapit aron hisgutan ang maong isyu, kondili ang Senado isip usa ka legislative body.
Apan sumala kang Tongol, sa mga milabay nga plenary session, wala pa’y senador nga nagpasiugda o nag-abli sa maong isyu, hinungdan nga wala pa kini’y aksyon hangtod karon.
Samtang, gipatin-aw usab ni Tongol nga adunay duha ka kondisyon nga kinahanglan matuman aron makabalik si Senator Jinggoy Estrada sa iyang pag-apil sa Senado ug sa impeachment court.
Matud niya, kinahanglan una nga mahuman ang 90-day preventive suspension nga gipahamtang kang Estrada, ug kinahanglan usab nga tugotan siya sa Sandiganbayan nga makapagpiyansa aron personal siyang makatambong sa mga sesyon sa Senado.
Gipasabot ni Tongol nga samtang nagpadayon ang preventive suspension ug wala pa siya makapagpiyansa, dili niya mahimo ang iyang katungdanan isip senador ug dili usab siya makaapil isip senator-judge sa impeachment trial.
Alang naman kang Senator Rodante Marcoleta, wala pa’y gipagawas nga aksyon ang Senado kabahin sa posibilidad sa iyang partisipasyon sa pagtaral.
