Gisumite ni Senador Imee Marcos ang taho sa chairman sa Senate Committee on Foreign Relations ngadto sa Office of the Ombudsman.
Kini may kalambigitan sa pagkasikop ni kanhi Presidente Rodrigo Duterte nga gidala sa Hague tungod sa kasong crime against humanity.
Sa iyang suwat ngadto kang Ombudsman Samuel Martires, si committee chairperson Imee Marcos namahayag nga ang pagdungog nagpadayag sa mga aksyon sa mga tag-as nga opisyal sa gobyerno.
Ang mga aksyon sa taas nga ranggo nga mga opisyal sa gobyerno mahimong maladlad kanila sa mga kaso nga kriminal ug administratibo.
Pipila sa mga opisyal nga gusto sa senador nga imbestigahon sa Ombudsman mao sila si Justice Secretary Jesus Crispin “Boying” Remulla, Interior Secretary Juanito Victor “Jonvic” Remulla, PNP chief Police Gen. Rommel Marbil, CIDG chief Police Gen. Nicolas Torre III, ug Special Envoy for Transnational Crimes Markus Lacanilao.
Nagtuo usab ang senador nga walay kahadlok ug walay gidapigan ang Ombudsman ug ilang pasakaan og kaso ang mga angayang pasakaan og kaso.
Kahinumdoman nga niadtong Marso 11, nasikop ang kanhi presidente aron mag-atubang og kasong crimes against humanity sa International Criminal Court gumikan sa maduguong kampanya batok sa ilegal nga drugas atol sa iyang paglingkod.
