Magdesisyon karong Lunes, Hulyo 20, ang Senate Impeachment Court kon aprobahan ba niini ang mosyon sa prosekusyon nga magpagawas og subpoena aron makuha ang bank records ug tax records ni Bise Presidente Sara Duterte ug sa iyang bana nga si Atty. Manases Carpio.
Sumala sa impeachment court, tun-an una sa mga senator-judges ang maong mosyon human madungog ang mga argumento sa prosekusyon ug depensa.
Atol sa caucus nga gihimo niadtong Biyernes, gihisgutan sa mga senador ang hangyo sa prosekusyon. Matud ni Impeachment Court Presiding Officer Francis Escudero, kinahanglan pa kining susihon pag-ayo tungod kay wala pa mahuman og basa sa tanang senador ang mga memorandum nga gisumite sa duha ka panig.
Sumala ni Senate Impeachment Court Spokesperson Atty. Reginald Tongol, ang mga senador lamang nga makatambong sa sesyon ang adunay katungod sa pagboto sa maong mosyon.
Matud niya, kinahanglan makakuha ang mosyon og labing menos 11 ka boto aron kini maaprubahan. Samtang, naglaom ang House prosecution panel nga aprobahan sa impeachment court ang ilang hangyo.
Sumala ni Atty. Benjamin Tolosa Jr., tigpamaba sa prosecution panel, lig-on ang ilang basihan sa paghangyo nga isumite ang maong mga dokumento.
Gipasiugda usab niya nga ang impeachment proceedings usa sa mga eksepsyon sa Bank Secrecy Law, busa mahimo nilang hangyoon ang maong mga rekord isip kabahin sa pagdungog sa impeachment case.
