Magpahigayon og imbestigasyon ang Senado sa Hulyo 1 kabahin sa pagpamusil sa usa ka eskwelahan sa Tacloban City nga misangpot sa kamatayon sa tulo ka tawo ug pagkaangol sa laing 15 ka indibidwal.
Matod ni Risa Hontiveros, ang pagdungog pangunahan sa Senate Committee on Women, Children, Family Relations, and Gender Equality aron masuta dili lamang ang mga detalye sa insidente kondili usab ang posibleng epekto sa online radicalization sa mga kabatan-onan.
Gipahayag usab ni Hontiveros nga gusto nilang susihon kon adunay papel ang pipila ka online platforms sa pagpakaylap sa bayolente nga mga ideya ug kon kini gigamit ba sa mga grupo nga nagmaniobra ug nag-awhag sa mga bata sa pagbuhat og kremin.
Base sa report sa mga awtoridad, duha ka menor de edad nga naglangkob og 14 ug 15 anyos ang giingong nalambigit sa pagpamusil.
Hinumdoman nga sa pagdungog sa Senado niadtong Abril, migawas ang alegasyon nga adunay mga online platform ug gaming spaces nga giingong gigamit aron impluwensiyahan ug i-radicalize ang pipila ka mga kabatan-onan.
Samtang, giimbestigahan usab sa Philippine National Police kon adunay kalambigitan ang online game nga GoreBox sa bayolente nga pamatasan sa duha ka kabataang nalambigit sa insidente.
Sa lugar diin nahitabo ang pagpamusil, nakarekober ang mga awtoridad og 40 ka basyo sa bala, usa ka .38-caliber revolver, ug usa ka 9mm Glock pistol.
