Aprubado na sa ikatulo ug katapusang pagbasa sa Senado ang sugyot balaodnon alang sa paghatag og Philippine citizenship sa mga basketbolistang sila Maodo “Malick” Diouf ug Elizabeth Jeanette Means.
Gipasa sa mga Senador ang House Bill Nos. 6640 ug 6641 aron mahimong hingpit nga Pilipino ang duha, nga makatabang sa pagpalig-on sa basketball program sa nasud.
Gipangunahan ni Senator Francis “Kiko” Pangilinan ang pag-sponsor sa maong sugyot balaodnon diin gihatagan og bili ang dako nilang kontribusyon sa basketball program sa Pilipinas.
Ipasa na kini sa Office of the President aron pirmahan ni President Ferdinand Marcos Jr. ug opisyal nang mahimong balaod.
Si Diouf nagdula isip foreign student athlete sa University of the Philippines, diin nahimong yawe siya sa pagkampeon sa Fighting Maroons sa UAAP Season 84 men’s basketball niadtong 2022.
Samtang si Means nagdula sa NCAA Division II sa US para sa Westminster University, diin ang iyang pamilya naggikan sa Naga, Camarines Sur.
