Andam ang Senado nga depensahan si Senador Ronald “Bato” dela Rosa kon ang International Criminal Court (ICC) moisyu og warrant of arrest batok kaniya apan sulod lang sa legal nga proseso ug saktong remedyo, sumala ni Senador Alan Peter Cayetano.
Si Dela Rosa, kinsa gipasanginlan nga may kalambigitan sa kampanya batok sa drugas sa administrasyong Duterte, una nang niingon nga mangayo siyag proteksiyon kang Senate President Francis “Chiz” Escudero aron malikayan ang posibleng pagbalhin niya ngadto sa mga awtoridad kon mopagawas og warrant ang ICC.
Dihang gipangutana kon mahimo bang protektahan sa Senado si dela Rosa bisan og nag-recess ang Kongreso, si Cayetano miingon nga “touchy subject” kini.
Si Cayetano niinsistir nga kinahanglang dunay legal nga giya gikan sa Korte Suprema kung ugaling moabot kining maong sitwasyon.
Giklaro usab niya nga ang konsepto sa sanctuary mao lamang ang pagsiguro sa legal nga katungod sa senador ug ang integridad sa Senado, ug dili ang pagsilbi nga bulag nga entidad nga dili mabalda sa balaod.
Una nang niingon si Escudero nga di siya motugot nga makasulod ang mga awtoridad sa Senado aron dakpon si dela Rosa.
Kini kon mangayo og proteksyon si dela Rosa ug magpabilin sa Senado sa higayon nga mopagawas og warrant of arrest ang ICC batok kaniya.
Matod niya nga base sa mga patakaran og praktis, dili tugotan sa Senado ang pagdakop sa bisan kinsa nga sakop niini sulod sa institusyon may sesyon man ang Kongreso o wala.
Matod niya kini dili base sa balaod kondili sa gitawag nga “institutional courtesy” nga nahimo nang tradisyon sa Senado ug kabahin na usab sa ilang mga patakaran nga dugay nang gisunod.
