Pormal na nga gipasaka ni Senador Risa Hontiveros ang kaso batok sa pipila ka mga prominenteng Duterte Supporter Vloggers ug uban pang mga indibidwal kalabot sa viral video sa kanhi testigo sa Senado.
Diin ang senadora ug ang iyang legal team personal nga miadto sa Department of Justice, partikular sa National Prosecution Service.
Dinhi iyang gisang-at ang iyang reklamo kalabot sa viral video ni Michael Maurillo, kanhi Senate Witness, nga nagbakwi sa iyang testimonya kalabot sa kaso ni Pastor Apollo Quiboloy.
Busa, pormal na niyang gipasaka ang kasong cyber-libel batok kang Atty. Ferdinand Topacio, online content creator Byron Cristobal (alias Banat By), Jeffrey ‘Ka Eric Celiz’, Krizette ‘Kiffy’ Chi, Jose ‘Jay’ Sonza ug Alex Destor (alias Tio Moren).
Bisan si Michael Maurillo, ang kanhi saksi sa Senado, gipasakaan usab og kaso kalabot sa isyu sa pagbaliktad sa iyang pamahayag.
Gipasabot usab ni Sen. Hontiveros ang mga aksyon nga gihimo sa mga respondents sa kaso.
Matod niya nga pinaagi sa tabang sa National Bureau of Investigation (NBI), padayon pa nilang gikolekta ang mga video nga gipakatag ug gi-post online batok ug giingong nagpasipala kaniya.
Busa, gipasabot sa senador nga aduna silay igong ebidensya nga magpamatuod sa iyang mga akusasyon batok sa nahisgutang mga vlogger ug indibidwal.
Sa bahin ni Michael Maurillo, usa usab siya sa gikiha sa senador tungod sa pagbaliktad sa iyang testimonya nga kahinumdoman nga maoy senate witness kaniadto batok kay Quibiloy.
Sa laing bahin, gibutyag ni Atty. Ferdinand Topacio, lakip sa mga gipasakaan og kaso, nga maghulat siya nga makadawat og kopya sa reklamo sa dili pa mopaambit sa iyang pamahayag.
