Gipaambit ni Sen. Panfilo “Ping” Lacson nga naka hunahuna siya kaniadto nga mobiya isip senador tungod sa mga tensyon ug kagubot nga nahitabo sa senado.
Sa usa ka pakighinabi niadtong Biyernes, Mayo 22, giingon ni Lacson nga makapaguol alang kaniya ang pagbag-o sa pagtan-aw sa publiko sa Senado kon itandi sa House of Representatives.
Sumala kaniya, kaniadto ginatan-aw ang Senado isip “big brother” o mas taas nga lebel sa check and balance sa gobyerno, apan murag nausab na kini karon.
Giangkon usab sa senador nga iyang napahayag sa pipila ka kauban ang posibilidad sa iyang pagbiya sa Senado, apan giaghat siya nga dili kini dayunon.
Bisan pa niini, giingon ni Lacson nga padayon gihapon silang naglaum sa gitawag nga Senate minority bloc nga mabalik ang respeto ug kredibilidad sa institusyon pinaagi sa mas maayong trabaho alang sa publiko.
Matud pa, adunay nahimong tensyon sa Senado human sa pagtambong ni Sen. Ronald “Bato” dela Rosa sa session hall pagkahuman sa dugay nga wala pagtambong niini may kalabotan sa warrant of arrest gikan sa International Criminal Court.
