Nagpahayag og kabalaka si Senator-Judge Robin Padilla atol sa paghisgot sa kahimtang sa pipila niyang kauban sa Senado nga dili makatambong sa impeachment trial ni Vice President Sara Duterte.
Sa iyang pamahayag sa impeachment court, gipaklaro ni Padilla nga ilang gihisgutan ang mga senador nga anaa karon sa prisohan aron ipakita sa publiko ang kahimtang sa ilang minority bloc ug dili aron tamayon o hukman ang ilang mga kauban.
Giinsistir ni Padilla nga dili angay tratuhon ang maong mga senador nga daw nahukman na, tungod kay wala pa man silay pinal nga conviction batok kanila.
Gihangyo usab niya nga unta gihatagan og higayon ang mga nakakulong nga senador nga makatambong sa impeachment proceedings pinaagi sa pakig-coordinate sa Sandiganbayan.
Matod ni Padilla, nanumpa silang tanan isip mga senador ug angay usab nga adunay pagsabot sa kahimtang sa matag usa, ilabina taliwala sa nagpadayon nga impeachment trial.
Samtang, nakahilak si Padilla sa pagtapos sa iyang pamahayag human hisgoti ang posibilidad nga basin dili na siya makabalik sa Senado.
Matod niya, basin mao na kini ang iyang kataposang adlaw sa Senado ug basin mingawon na usab siya sa iyang mga kauban.
