Giangkon ni Senador Robinhood Padilla nga iyang gisakay lamang si Senador Ronald dela Rosa paggawas sa Senado ug gipaubos sa Makati City, apan wala siya kahibalo kung asa paingon ang senador.
Gihimo ni Padilla ang pagpasabot human sa mga akusasyon nga gitabangan niya si dela Rosa nga makaikyas gikan sa Senado, nga iyang gipanghimakak ug giingon nga walay aktibong arrest warrant gikan sa lokal nga korte sa nasud.
Miingon usab si Senador Padilla nga iyang gipahibalo si Sen. dela Rosa nga kinahanglan na kini mopauli sa ilang balay sayo sa buntag niadtong Mayo 14 tungod kay gipangita na siya sa iyang asawa, unom ka oras human sa nahitabo nga pagpamusil sulod sa Senado sa miaging semana.
Gipasabot pa ni Padilla nga dili niya madumilian ang senador kay wala kini sakyanan tungod kay gipaubos lamang siya sa Senado sa sakyanan ni Senate President Alan Peter Cayetano.
Sumala ni Padilla, milugsong si dela Rosa sa Makati City diin didto na siya nisakay sa iyang kaugalingong sakyanan. Nagtukma usab ang pahayag ni Padilla sa CCTV footage gikan sa Senado nga nagpakita sa paggawas sa duha gikan sa compound sa Senado alas 2:30 sa kadlawon niadtong Mayo 14.
Gikumpirma usab kini sa report ni DILG Secretary Jonvic Remulla nga nakita ang puti nga sakyanan ni Padilla nga paingon sa Makati City. Giingon usab ni Padilla nga wala sila miikyas kay walay nagpugong kanila sa paggawas.
Matod pa niya, daghang pulis sa sulod ug gawas sa Senado ug adunay CCTV cameras, apan wala gayod nagpugong kanila sa paggawas sa premises sa Senado.
