DAVAO CITY – Gikagubtan sa tanan si Senator Manny Pacquiao atul sa pagtambong niini sa grand opening sa Davao Region Athletic Association (DAVRAA) Meet 2018 kagahapong adlawa.
Kini ang gibutyag sa Bombo Radyo ni Guilling Guillermo, kinsa nakasaksi sa pormal nga opening sa maong sports event.
Nagpasalamat si Sen. Pacquiao sa pag-imbita kaniya isip dinapit bisita. Una gisugdan ang paghatag ug mensahe, katulo ka higayon nga gihangyo ni Pacquiao ang mga atleta nga magsinggit aron ipakita ang ilang presensiya.
Sumala pa sa kanhi boxing champion, hilabihan ang iyang kalipay sa pagtan-aw sa libuan ka mga atleta kung asa nahinumdom niya sa mga nasampit ang kagustuhan niya sa sports niadtong bata pa siya.
Gani, gibutyag sa fighting senator nga dili boxing ang iyang unang nagustuhan nga sports kon dili baseball.
Apan dihang naigo siya sa bola sa baseball ug napiang, niundang na siya og nahimong volleyball player, dayun runner og nagbasketball.
Nagsugod sa pag-boxing tungod naaghat sa premyo nga iyang makuha kung makadaug og dayun nahimong amateur boxer hangtud nga nahimong professional boxer.
Wala makatambong si Davao City Mayor Inday Sara Duterte apan nagpadala og audio-visual message unod ang pagpangayo og katahuran human nga wala makamtambong kagahapon apil ang amahan nga si Pangulong Rodrigo Duterte.
Samtang, gidasig ni Sen. Manny Pacquiao ang mga atleta sa Davao Region Athletic Association (DAVRAA) Meet 2018 nga himuon ang tanan aron magmalampuson.
Matud pa niini, dili angayang gamitong ‘excuse’ ang kapobrehon aron dili makab-ot ang mga pangandoy sa kinabuhi.
Inay, kini matud pa ang kuhaan ug inspirasyon aron mahimong determinado sa unsa man ang gustong makab-ot.
Gani, kini matud pa ang iyang sikreto hinungdan nga nagmalampuson gawas pa anga naka-focus siya sa pagkab-ot sa iyang ‘goal’.
Sa iyang pamahayag angayang mag-ampo sa Ginoo nga giyahan sa tanang gustong buhaton.
Kung magmalampuson na sa kinabuhi, angayang magpabilin nga humble’ sa tanan.
Samtang, nagtuo nga ang anaa sa mga atleta sa Davao Region Athletic Association Meet ang posibleng sunod nga ‘world boxing champion” og gold medalist sa olympics.
Nasayran nga dili muubos sa kapin 7,000 ka atleta uban ang ilang mga coaches ang mipartisipar sa maong aktibidad.
