GENERAL SANTOS CITY – All-set na ang pagpangandam alang sa bongga nga 40th birthday celebration ni Sen. Manny Pacquiao ning adlawa sa usa ka mall dinhi sa siyudad.
Naghinam-hinam na ang kadaghanan sa mga imbitado nga bisita, human gipasilip sa social media ang pipila sa mga madag-an sa pa-raffle sa fighting senator, sama sa upat ka kotse, 40 ka motorsiklo, ug 40 appliances, ug uban pa.
Gipasalig sa Police Regional Office 12 ang hugot nga pagpatuman sa seguridad sa tibuok siyudad, kung asa andam na usab ang mga uniformed personnel nga i-dedeploy sa sulod ug gawas sa KCC Mall ug Veranza, nga venue sa birthday party ni Pacquiao.
Hinungdan nga mas istrikto sa mga checkpoints sa entry ug exit points sa siyudad, hilabi na nga gilauman ang pagtambong ni Pangulong Rodrigo Duterte, nga nailhan nga suod kang Pacquiao.
Gawas sa pangulo, pipila ka bigtime personalities usab ang giatangan nga mutambong gikan sa showbiz ug pulitika.
Giatangan usab ang mamahimong performance sa Asia’s Got Talent Season 1 champion nga El Gamma Penumbra, ug pipila sa mga sikat nga local bands sama sa Gifford, Kuerdas, J Brothers, Siakol, Shamrock, Cueshe, ug Chocolate Factory.
Kahibaluan nga kagahapong adlawa, sa bisperas sa iyang adlaw’ng natawhan, nanghatag usab si Pacquiao ug 2,000 ka grocery bags sa mga residente sa Tinoto, Maasim, Sarangani, nga kabahin gihapon sa iyang 40th birthday celebration, nga matag tuig niyang ginahimo.
